من وقت ما اتعرّفت على الإنترنت و هو شيء عزيز على قلبي جداً
كائن حي يعيش و يتعايش جوّايا
في الأول كنت بدخل أسمع الأغاني المفضلة عندي
بعد كدا ابتديت اتعرّف على الناس من خلال الشات
بعد كدا ابتديت اتعرّف على مواقع فنيّة تنمّي قدراتي و تخلّيني أكتشف إني عندي مقدرة إني أعمل حاجات كتير ماكنتش اعرف إنها موجوجة فيّا، مع العلم إني ماعنديش موهبة محدّدة أكرّس ليها وقتي الفاضي، فبحب أعمل أي حاجة بديلة أقدر أعملها
بعد كدا عرفت حاجة إسمها مدوّنة
و دي كانت مرحلة عزيزة على قلبي جداً، اتعرّفت من خلالها على ناس لسّة لحد دلوقتي بعتز بصداقتهم
بعد كدا جه عصر الفيسبوك، و اللي لسّة لحد دلوقتي باهرني في كل حاجة فيه
**
و كفاية إن الإنترنت أصلاً هو اللي خلّاني أتعرّف على حوزي
:))
**
أمّا عن دلوقتي، فالإنترنت بالنسبالي هو قمّة السعادة و الإستفادة
معظم قراءاتي و معلوماتي مصدرها هو
أمّا الحاجة العبقرية اللي ماعرفتش قيمتها غير مؤخراً جداً، هي الفيديوهات التعليمية اللي موجودة في أي حتة دي!!
يعني انا في الأوّل كنت بقول إني مش بحب التعليم الذاتي و إني لو عايزة اتعلّم حاجة لازم و لا بد أروح كورس في مكان متخصّص للتعليم
بس الكلام دا كلّه أي كلام! اليوتيوب كفيل إنّه يعلّمك أي حاجة انت عايزها في يمكن ربع الوقت اللي محتاجه في أي كورس
واطلق العنان لفنّك و إبداعك
**
أنا مدينة فعلاً لكل الإختراعات المذهلة اللي حصلت في العقد أو العقدين الأخيرين
و ممتنّة لكل شخص بيطوّر منها و بيبذل وقت و مجهود علشان يفيد الآخرين
:)
و أدين أي حد عايز يشوّه الحاجات اللي مصنوعة عشان تفيدنا
و الأشخاص دول،للأسف، موجودين في كل ناحية من أنحاء الحياة
ليست هناك تعليقات:
إرسال تعليق